HUKUMU YA KESI YA MAUAJI YA MWANGOSI NI JULAI 21

Postedy by Esta Malibiche on July 20 . 7.2016

WAZEE wawili kati ya watatu wa baraza la wazee wa Mahakama Kuu Kanda ya Iringa wamesema Polisi Pacificius Cleophace Simoni anayetuhumiwa kuhusika na mauaji ya mwanahabari Daudi Mwangosi; alimuua mwanahabari huyo bila kukusudia kwa kuzingatia maelezo yake ya ungamo aliyoyatoa kwa Mlinzi wa Amani Septemba 5, 2012.

Wazee hao waliyasema hayo hivikaribuni wakati Jaji wa mahakama hiyo, Paul Kiwelo akihitimisha usikilizwaji wa shauri hilo ambalo hukumu yake ataitoa  KESHOKUTWA Julai 21, mwaka huu.

“Niwashukuru mawakili wa utetezi na Jamuhuri, niwashukuru watu wote waliokuwa wakiudhuria kesi hii tangu ianze mpaka leo inapohitimishwa kwa ajili ya hukumu itakayotolewa Julai 21, mwaka huu,” Jaji Kiwelo alisema.

Kwa mara ya kwanza Simoni alifikishwa mahakamani hapo Septemba 12, 2012 akituhumiwa kumuua Mwangosi kwa kukusudia katika tukio lilitokea katika kijiji cha Nyololo, wilayani Mufindi Mkoani Iringa Septemba 2, 2012 wakati mwandishi huyo alipokuwa akiwajibika katika kazi zake za kutafuta habari wakati wa ufunguzi wa matawi ya Chama cha Demokrasia na Maendeleo (Chadema).