WIZARA YA AFYA YATOA TAHADAHARI YA HOMA YA MANJANO

Na Jacquiline Mrisho – Maelezo

Wizara ya Afya,Maendeleo ya Jamii,Jinsia, Wazee na Watoto imetoa tahadhari juu ya ugonjwa wa homa ya manjano ambao umethibitika kuwepo nchi ya jirani ya Kenya.

Tahadhari hiyo imetolewa leo Jijini Dar es salaam na Waziri wa Afya, Maendeleo ya Jamii, Jinsia, Wazee na Watoto, Ummy Mwalimu alipokua akiongea na waandishi wa habari  kuhusu mwenendo wa ugonjwa wa kipindupindu nchini ambapo katika wiki ya tarehe 14 Machi hadi 20 Machi mwaka huu takwimu zinaonyesha kuwa kati ya Mikoa 13 yenye wagonjwa  wa kipindupindu , jumla ya wagonjwa 738  na vifo 16 vimeripotiwa  huku Mkoa wa Manyara ukiongoza kwa kuwa na wagonjwa wengi wa kipindupindu.

Akielezea kuhusu ugonjwa wa homa ya manjano,Waziri Ummy Mwalimu amesema kuwa ugonjwa huu unasababishwa na virusi ambavyo huenezwa na mbu aina ya Aedes na baadhi ya dalili zake ni homa, kuumwa kichwa,maumivu ya misuli na mgongo,kupoteza hamu ya kula pia kutoka damu sehemu za mwili zilizo wazi.

“Wizara inapenda kutoa tahadhari ya ugonjwa wa homa ya manjano kwa wananchi wote na hasa wanaokaa mipakani mwa nchi ya Kenya kwa kuwa ugonjwa huu hauna tiba kamili ila una chanjo, mgonjwa anatibiwa kutokana na dalili zinazojitokeza ikiwa ni pamoja na kupewa dawa za kushusha homa, maumivu, kuongezewa maji mwilini kwa kunywa au kuwekewa dripu”alisema Waziri Ummy.

Aidha, Waziri Ummy amewaagiza Waganga Wakuu wa Mikoa na Wilaya zote nchini kupambana na magonjwa ya kuambukiza kwa kuimarisha  mfumo wa ufuatiliaji wa wagonjwa na utaratibu wa utoaji taarifa za magonjwa ya kuambukiza, kuhakikisha wasafiri wanaoingia na kutoka nchi zenye hatari ya ugonjwa huo wanapewa chanjo kabla ya kuingia nchi nyingine, kutoa elimu ya afya kwa wananchi, kuandaa timu za wataalam, vifaa tiba na chanjo za kutosha ili kuweza kukabiliana na ugonjwa huo endapo utajitokeza nchini kwa kusimamia na kuhimiza usafi wa mazingira na kuzingatia kanuni za afya.

Pia,amewaonya maofisa wanaotoa chanjo ya homa ya manjano walioko katika vituo vya Afya vya kupokelea wageni wanaoingia na kutoka nchini kuacha mtindo wa kupokea rushwa na kuwapitisha watu bila kupatiwa chanjo.

Mwisho, ametoa wito kwa wananchi kuchukua tahadhari na kushirikiana kwa karibu na wataalamu wa afya walioko katika maeneo yao  kwa kutoa taarifa haraka kwenye uongozi husika endapo kuna mgonjwa mwenye dalili za kipindupindu au homa ya manjano.